Lycée George-Sand La Châtre

Chapitre LV.

Comment en haulte mer Pantagruel ouyt diverses parolles degelées.

En pleine mer nous banquetant, grignotans, devisans, & faisans beaulx discours, Pantagruel se leva & tint en pieds pour découvrir l’environ. Puys nous dist :

Compaignons, oyez vous rien ? Me semble, que j’ouys quelques gens parlans en l’air, je n’y voy toutesfoys personne. Escoutez.

A son commandement nous feusmes tous attentifz, & à pleines aureilles humions l’air comme belles huytres en escalle, pour entendre si voix ou son aulcun y seroit espars...

Chapitre LVI.

Comment entre les parolles gelées Pantagruel trouva des motz de gueule.

Seigneur, de rien ne vous effrayez, dit le pilote. Icy est le confin de la mer glaciale, sur laquelle fut au commencement de l’hyver dernier passé grosse & felonne bataille, entre les Arismapiens, & les Nephelibates.

Lors gelèrent en l’air les parolles & crys des homes & femmes, les chaplis des masses, les hurtys des harnoys, des bardes, les hannissements des chevaulx, & tout effroy de combat. A ceste heure la rigueur de l’hyver passée, advenant la serenité & temperie du bon temps, elles fondent & sont ouyes.

Pardieu, dit Panurge, je l’en crois, mais en pourrions nous voir quelqu’une. Me soubvient avoir lu que l’orée de la montaigne en laquelle Moïse reçut la loy des Juifz le peuple voyoit les voix sensiblement.

Tenez tenez (dist Pantagruel) voyez en cy qui encores ne sont degelées.

Lors nous jeta sus le tillac plènes mains de parolles gelées, & sembloient dragées perlées de diverses couleurs. Nous y veismes des motz de gueule, des motz de sinople, des motz de azur, des motz de sable, des motz dorez. Les quelz estre quelque peu eschauffez entre nos mains fondoient, comme neiges, & les oyons realement. Mais ne les entendions. Car c’estoit languaige Barbare.